فاهمينها غلط

فهموني بس بتتباهوا بإيه !
بالغنا و المال؟!
ياه دول طلعوا غلابة أوي يا خال
مايعرفوش إن ربنا هوالغني الستار
فاكرين إن الفلوس تشتري الفرحة
مع إن بالرضا بالمقسوم و ابتسامة صغيرة يتحل كل محال
و اللي فاكرين إن الفلوس تشتري الحلاوة
نسيوا إن الابتسامة نص الجمال
*
فاهمين الدنيا غلط و مش شايفين غير رأيهم
و دة أكبر غلط ﻷنهم مش عايشين في الدنيا لوحدهم
فاكرين إن حياتهم طويلة يعيشوها براحة راحتهم
بالطول بالعرض و مفيش حد قدهم
و نسيوا إن رب الخلق شايفهم
*
ممكن لو كانوا حكموا العقول
كان كل واحد هيبقي عن تصرفاته مسئول
و يفضل مراعي ربنا علي طول

لو كل واحد إيمانه بقضاء ربنا كبير
و بجد يكون علي دينه بيغير
كان زمان مركزنا بين الدول مش قليل

احكولهم

احكولهم عن جند قادر
احكولهم عن عزم نادر
احكولهم عن شعب صابر
و لحد دلوقتي لسة بيعافر
احكولهم عن تاريخ باهر
عن حروب لسة صيتها حاضر
عن انتصارات و انجازات
و تضحيات من شباب ناضل
واجهنا العدو الصهيوني الغادر
اللي احتل فلسطين ظلم
و بقاله دولة بقدرة قادر
واجهنا كل عدو كابر
و من عزم المصريين ساخر
و فاكر انه علينا قادر
و بدأت حرب و اتنين و عاشر
و مقدروش يعدو الخساير
و الجيش اللي اتقال عليه لا يقهر
اتهزم بشجاعة جند باسل